༼བྱང་ཐང་ཡུལ་ནས་ཡོང་ཡོད།༽

ཚིག །ཉམ་ཆུང་གི་རི་བོང་།

དབྱངས།  རང་གསལ་དཔལ་ལྡན།

ལེན་མཁན།   ཐང་མཚོ།

ཡིད་འོང་གཟུགས་མཛེས་མེ་ཏོག་འཛུམ་ཞལ་ཅན། །

འགྱུར་ཁུག་སྙན་མོ་དཔྱིད་ཀྱི་རྒྱལ་མོ་འདྲ། །

བཅུ་དྲུག་ལང་ཚོ་ལུག་ཆུང་ཚར་ཞྭ་གྱོན། །

བུ་མོ་ཁྱེད་རང་ས་ཕྱོགས་གང་ནས་ཡོང་། །

མཛེས་པའི་སྤང་ལྗོངས་དཀར་དམར་མེ་ཏོག་བཞད།།

རྟ་ནོར་ལུག་གསུམ་ནམ་མཁའི་སྐར་ཚོགས་མཚུངས།།

འབྲི་མོའི་བཞོ་དབྱངས་བར་མེད་རྣ་བའི་བཅུད།།

བུ་མོ་ང་ནི་བྱང་ཐང་ཡུལ་ནས་ཡོང་།།

ཁ་འཇམ་ཚིག་གིས་ཕ་མའི་བཀའ་དྲིན་གསོ།།

ཞེ་འཇམ་འཛུམ་གྱིས་བརྩེ་བའི་བུ་ཕྲུག་སྐྱོངས།།

རང་ཚུགས་མི་འཆོར་སྟག་ཤར་རང་མདངས་ཅན།།

བུ་ཆུང་ཁྱེད་རང་ས་ཕྱོགས་གང་ནས་ཡོང་།།

གངས་ལྷ་མེ་ཏོག་གངས་རིའི་འདབས་སུ་བཞད།།

སྤང་རྒྱན་མེ་ཏོག་སྤང་དཀར་མགུལ་དུ་མཛེས།།

སེར་ཆེན་མེ་ཏོག་ཆུ་མོའི་གཞུང་དུ་འཚེར།།

བུ་མོ་ང་ནི་བྱང་ཐང་ཡུལ་ནས་ཡོང་།།

མགྱོགས་པའི་གྱི་ལིང་རྟ་མཆོག་འོག་ན་བཞོན།།

སྤང་ཐང་ཁ་དཀར་རྐྱང་ལ་བང་རྩལ་འགྲན།།

ཆུ་མིག་དགུ་སྒྲིལ་འུར་རྡོ་ཀླད་ནས་བསྐོར།།

བུ་ཆུང་ཁྱེད་རང་ས་ཕྱོགས་གང་ནས་ཡོང་།།

མཛེས་སྡུག་ལྡན་པའི་སྐྱིད་པོ་བྱང་ཐང་འདི།།

ང་དང་ཁྱེད་ཀྱི་སེམས་ཀྱི་ཞིང་ས་ཡིན།།

ལྷན་འཛོམས་དགའ་སྤྲོ་གླུ་དབྱངས་སྙན་མོ་འདི།།

མཐོ་སྒང་ཡུལ་དུ་ཕུལ་བའི་མཆོད་པ་ཡིན།།